کلام : حضرت پیر سید نصیر الدین نصیرؔ گیلانی رحمتہ الله علیہ

بساطِ بزم الٹ کر کہاں گیا ساقی

فضا خموش ، سُبُو چپ ، اداس پیمانے

نہ اب وہ جلوہ یوسف نہ مصر کا بازار

نہ اب وہ حسن کے تیور ، نہ اب وہ دیوانے

نہ حرفِ حق ، نہ وہ منصور کی زباں ، نہ وہ دار

نہ کربلا ، نہ وہ کٹتے سروں کے نذرانے

نہ با یزید ، نہ شبلی ، نہ اب جنید کوئی

نہ اب و سوز ، نہ آہیں ، نہ ہا و ہو خانے

خیال و خواب کی صورت بکھر گیا ماضی

نہ سلسلے نہ وہ قصے نہ اب وہ افسانے

نہ قدر داں ، نہ کوئی ہم زباں ، نہ انساں دوست

فضائے شہر سے بہتر ہیں اب تو ویرانے

بدل گئے ہیں تقاضے مزاجِ وقت کے ساتھ

نہ وہ شراب ، نہ ساقی ، نہ اب وہ میخانے

کلام : حضرت پیر سید نصیر الدین نصیرؔ گیلانی رحمتہ الله علیہ